திற்பரப்பு:திற்பரப்பு அருவியில் மிதமாக தண்ணீர் கொட்டும் அருவியில் குளித்து சுற்றுலா பயணிகள் ஆனந்தத்துடன் செல்கின்றனர்.மாவட்டத்தில் ஆங்காங்கே கோடை மழை பெய்து வந்தாலும் வெயிலின் தாக்கம் அதிகமாகவே காணப்படுகிறது. திற்பரப்பு அருவியில் கடந்த மாத இறுதியில் சிறிதளவு தண்ணீரே காணப்பட்டது. ஆனால் கடந்த சில நாட்களாக அருவியில் குளிப்பதற்கு தகுந்த அளவு தண்ணீர் கொட்டுகிறது. கடந்த இரண்டு நாட்களாக சுற்றுலா பயணிகள் வருகை அதிகரித்துள்ளது. கோடை விடுமுறை துவங்கி வருவதால் சீசன் துவங்கியுள்ளது. இனி தொடர்ந்து சில வாரங்கள் சுற்றுலா பயணிகள் வருகை அதிகமாக காணப்படும் என எதிர்பார்க்கப்படுகிறது. அதிகமான அளவு சுற்றுலா பயணிகள் வருவதால் சுத்திகரிக்கப்பட்ட குடிநீர் கிடைப்பதில்லை.

இதனால் சுற்றுலா பயணிகள் தண்ணீருக்காக அலையும் அவலம் தொடர்கிறது. இதற்கிடையே சுற்றுலா தலத்தில் நிறுத்தி வைக்கப்பட்டிருந்த படகு சேவை இரண்டு நாட்களாக துவங்கியுள்ளது. பழைய படகுகளை மாற்றிவிட்டு புதிய படகுகளை இயக்க வேண்டும் என்ற கோரிக்கையும் சுற்றுலா பயணிகள் மத்தியில் உள்ளது. அதிகமான படகுகள் காலாவதியான பெடல் படகுகளாக உள்ளதால் இப்படகுகளை இயக்க சுற்றுலா பயணிகள் சிரமப்படுகின்றனர்.

http://www.dinamalar.com/News_Detail.asp?Id=224699