பக்ரீத் பண்டிகை குர்பானி வழங்க நெல்லை,தூத்துக்குடி, குமரிக்கு 9 ஒட்டகங்கள் வருகை

நவம்பர் 05,2011,03:43 IST

திருநெல்வேலி:பக்ரீத் பண்டிகையன்று குர்பானி வழங்குவதற்காக ஆந்திராவில் இருந்து நெல்லை, தூத்துக்குடி, குமரி மாவட்ட பகுதிகளுக்கு 9 ஒட்டகங்கள் வாகனங்கள் மூலம் கொண்டு வரப்பட்டுள்ளன.முஸ்லிம்களின் முக்கிய பண்டிகைகளில் பக்ரீத் பண்டிகையும் ஒன்றாகும். இந்த பண்டிகையன்று முஸ்லிம்கள் சிறப்பு தொழுகை நடத்துவது வழக்கம்.அதன் பின் முஸ்லிம்கள் தங்கள் வசதிக்கு ஏற்ப ஆடு, மாடு, ஓட்டகம் போன்றவற்றை பலியிட்டு, அந்த இறைச்சியை 3 பங்குகளாக பிரித்து ஒன்றை வீட்டிற்கும், 2வது பங்கை குடும்பத்தார், உறவினர்களுக்கும், 3வது பங்கை ஏழைகளுக்கும் வழங்குவது வழக்கம்.

அதுபோல் இந்த ஆண்டு பக்ரீத் பண்டிகை வரும் 7ம்தேதி கொண்டாடப்படுகிறது. இந்த பண்டிகைக்காக முஸ்லிம்கள் குர்பானி வழங்க ஆந்திரா மாநிலம், கடப்பா ஓட்டக சந்தையில் சுமார் 150 முதல் 200 கிலோ வரை எடை கொண்ட ஒட்டகம் தலா 40 ஆயிரம் ரூபாய் முதல் 50 ஆயிரம் ரூபாய்க்கு வாங்கப்பட்ட 9 ஓட்டகங்கள் வாகனம் மூலம் தென் மாவட்டங்களுக்கு கொண்டு வரப்பட்டுள்ளன. இதில் நெல்லை மாவட்டம், மேலப்பாளையம் -3 ஏர்வாடி - 2, களக்காடு -1, செங்கோட்டை -1, குமரி மாவட்டம் திங்கள்சந்தை - 1, தூத்துக்குடி மாவட்டம் காயல்பட்ணம்-1 என மொத்தம் 9 ஓட்டகங்கள் வந்துள்ளன.பக்ரீத் பண்டிகையை முன்னிட்டு நெல்லை மாவட்டம் பாவூர்சத்திரம், மேலப்பாளையம் சந்தைகளில் பல கோடி ரூபாய் மதிப்புள்ள கிடா(ஆடுகள்) விற்பனையாகியுள்ளது.

http://www.dinamalar.com/district_detail.asp?id=343894