திருநெல்வேலி:பாளை ஜான்ஸ் கல்லூரியில் நாளை (17ம் தேதி) கல்லூரி மாணவ, மாணவிகளுக்கான தொழில் நெறி கண்காட்சி மற்றும் கருத்தரங்கு நடக்கிறது.வேலைவாய்ப்பு மற்றும் பயிற்சி துறை சார்பில் நெல்லை மாவட்ட வேலைவாய்ப்பு அலுவலகம் சார்பில் கல்லூரி மாணவ, மாணவிகளுக்கான தொழில் நெறி கண்காட்சி மற்றும் கருத்தரங்கு பாளை ஜான்ஸ் கல்லூரியில் நாளை (17ம் தேதி) காலை 11 மணிக்கு நடக்கிறது.பாளை ஜான்ஸ் கல்லூரி செயலாளர் சீனிக்குமார் செல்வநாயகம் தலைமை வகித்து கண்காட்சியை திறந்து வைத்து உயர்கல்வி என்ற தலைப்பில் பேசுகிறார்.

மாவட்ட வேலைவாய்ப்பு அலுவலர் சண்முக சுந்தர் வரவேற்கிறார். மதுரை மண்டல துணை இயக்குனர் பிச்சம்மாள் ஆறுமுகம் முன்னிலை வகித்து போட்டி தேர்வுகள் என்ற தலைப்பில் பேசுகிறார்.சுய வேலைவாய்ப்பு மற்றும் பாங்க் கடன் என்ற தலைப்பில் தொழில் மைய பொது மேலாளர் ராஜராஜன், தனியார் துறையில் வேலைவாய்ப்புகள் மற்றும் பயிற்சிகள் என்ற தலைப்பில் ஆதிதிராவிடர் மற்றும் பழங்குடியினருக்கான பயிற்றுவிப்பு நிலைய உதவி இயக்குனர் ஜோதிமணி, வேலைவாய்ப்பு வழிகாட்டல் என்ற தலைப்பில் பாளை ஜான்ஸ் கல்லூரி உதவி பேராசிரியர் கிருபாகரன் ஆகியோர் பேசுகின்றனர்.இளநிலை வேலைவாய்ப்பு அலுவலர் காளிமுத்து நன்றி கூறுகிறார். இக்கண்காட்சி மற்றும் கருத்தரங்கை அனைத்து கல்லூரி மாணவ, மாணவிகள் பயன்படுத்தி கொள்ள வேண்டும் என்று மாவட்ட வேலைவாய்ப்பு அலுவலர் சண்முகசுந்தர் தெரிவித்தார்