நெல்லை

நடுரோட்டில் டயர் வெடித்து கார் கவிழ்ந்து 2 பேர் பலியானார்கள். 8 பேர் படுகாயம் அடைந்தனர்.
நாங்குநேரி அருகே நடந்த இந்த விபத்து பற்றிய விவரம் வருமாறு:–

கோவிலுக்கு சென்றவர்கள்

புதுக்கோட்டை மாவட்டம் பெருங்கலூரில் இருந்து ஒரு குடும்பத்தினர் கன்னியாகுமரியில் உள்ள ஒரு கோவிலுக்கு சாமி கும்பிட காரில் சென்றனர். அங்கு சாமி கும்பிட்டு விட்டு, அனைவரும் ஊருக்கு புறப்பட்டனர். காரை சிவா என்ற பழனியாண்டி (வயது 24) என்பவர் ஓட்டி வந்தார். கார் நேற்று மதியம் நெல்லை மாவட்டம் வள்ளியூரை தாண்டி 4 வழிச்சாலையில் வந்து கொண்டிருந்தது.

நாங்குநேரி அருகே உள்ள வாகைகுளம் நோக்கி வந்த போது திடீரென்று காரின் டயர் பயங்கர சத்தத்துடன் வெடித்தது. இதில் கார், டிரைவரின் கட்டுப்பாட்டை இழந்த நடுரோட்டில் உருண்டு கவிழ்ந்தது.

2 பேர் பலி

இதில் சம்பவ இடத்திலேயே பெருங்கலூரைச் சேர்ந்த ராணி என்ற ராணிமுத்து (50), டிரைவர் பழனியாண்டி ஆகியோர் உடல் நசுங்கி சம்பவ இடத்திலேயே பரிதாபமாக இறந்தனர். காரில் இருந்தவர்கள் காப்பாற்றுங்கள் என்று அபய குரல் எழுப்பினார்கள். அலறல் சத்தம் கேட்டு அக்கம் பக்கத்தில் இருந்தவர்கள் ஓடி வந்து காருக்குள் சிக்கி உயிருக்கு போராடி கொண்டிருந்தவர்களை மீட்டனர். விபத்து பற்றி நாங்குநேரி போலீசுக்கு தகவல் தெரிவித்தனர்.

நாங்குநேரி துணை போலீஸ் சூப்பிரண்டு கோவிந்தராஜ், இன்ஸ்பெக்டர் ஜெயபிரின்ஸ், சப்–இன்ஸ்பெக்டர் சுரேஷ்குமார் மற்றும் போலீசார் சம்பவ இடத்திற்கு விரைந்து வந்து பார்வையிட்டனர். காயம் அடைந்தவர்களை மீட்டு, ஆம்புலன்சு மூலம் வள்ளியூர், நாகர்கோவிலில் உள்ள தனியார் ஆஸ்பத்திரியில் சேர்க்கப்பட்டனர். அங்கு அவர்களுக்கு சிகிச்சை அளிக்கப்பட்டு வருகிறது.

8 பேர் படுகாயம்

விபத்தில் பலியான ராணிமுத்து, பழனியாண்டி ஆகியோரது உடல்கள் பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர்.
விபத்தில் காயம் அடைந்தவர்கள் விவரம் வருமாறு:–

சிவசுப்பிரமணியன் (58), ராமையா (25), புவனேசுவரி (21), கீதா (21), அசோக் (17), கிரி (13), தங்கமீனா (7), பரணிதரன் (3) ஆகியோர் ஆஸ்பத்திரியில் சிகிச்சை பெற்று வருகிறார்கள்.

இதுகுறித்து நாங்குநேரி போலீசார் வழக்குபதிவு செய்து விசாரணை நடத்தி வருகிறார்கள்.

http://www.dailythanthi.com/node/41526