ஏர்வாடி : ஏர்வாடியில் வீட்டில் துப்பாக்கி தயாரித்த முன்னாள் ராணுவ வீரர் உள்பட 2 பேரை போலீசார் கைது செய்தனர். நெல்லை மாவட்டம் ஏர்வாடியில் சட்டவிரோதமாக துப்பாக்கி தயாரிக்கப்படுவதாக உளவுத்துறைக்கு தகவல் கிடைத்தது. நாங்குநேரி போலீசார் ஏர்வாடி லெப்பை வளைவு வடக்கு தெருவை சேர்ந்த முகைதீன் பாஷாகான் (60) என்பவரது வீட்டில் நேற்று முன்தினம் இரவு சோதனை நடத்தி கைது செய்தனர். அவர் வீட்டிலிருந்து 3 துப்பாக்கிகள், 2 துப்பாக்கி பட், துப்பாக்கி பேரல், 111 ஈய குண்டுகள் ஆகியவற்றை பறிமுதல் செய்தனர்.

விசாரணையில், முகைதீன் பாஷாகான் ராணுவத்தில் சமையல் மாஸ்டராக பணியாற்றி வந்துள்ளார். வீட்டிலிருந்தவாறு ஏர்கன் ரக துப்பாக்கி தயாரித்தல், பழுது நீக்குதல் மற்றும் துப்பாக்கிகளுக்கு உதிரி பாகங்களை மாற்றிக் கொடுத்தல் போன்ற வேலைகளில் ஈடுபட்டு வந்தது தெரியவந்தது.

முகைதீன் பாஷாகான் கொடுத்த தகவலின்பேரில் துப்பாக்கி தயாரிக்க உடந்தையாக இருந்ததாக வள்ளியூரில் வெல்டிங் பட்டறை நடத்தி வரும் களக்காடு எஸ்என் பள்ளிவாசல் பிள்ளையார் கோயில் தெருவைச் சேர்ந்த பிரவீன் (28) என்பவரை போலீசார் கைது செய்தனர்.  நாங்குநேரி கோர்ட்டில் ஆஜர்படுத்தப்பட்டு காவலில் வைக்கப்பட்டனர்.

Produced a gun in the house arrest of ex-soldier