மறைந்து வரும் கலைக்கு புதிய சாதனை ஏற்படுத்த முயற்சி: 26 மணி நேர சிலம்பாட்டம்

மார்ச் 14,2013,02:38 IST

திருநெல்வேலி:அழிந்து வரும் பாரம்பரிய கலையான சிலம்பாட்டம் குறித்து விழிப்புணர்வை ஏற்படுத்தும் வகையில் உலக சாதனையை ஏற்படுத்தும் வகையில் தொடர்ந்து 26 மணி நேர சிலம்பாட்ட நிகழ்ச்சி பாளையில் வரும் 23ம் தேதி ஆரம்பமாகிறது. தமிழர்களின் பாரம்பரிய வீர கலைகளில் ஒன்றான சிலம்ப கலை கொஞ்சம், கொஞ்சமாக மறைந்து வருகிறது. உலக அளவில் இக்கலையை பிரபலப்படுத்தும் வகையிலும், சிலம்ப கலை குறித்து பள்ளி, கல்லூரி மாணவ, மாணவிகள், பொதுமக்களிடையே விழிப்புணர்வை ஏற்படுத்தும் வகையிலும், உலக அளவில் இக்கலையை பிரபலப்படுத்தும் வகையிலும் உலக சாதனை படைக்கும் வகையில் பாளையில் தொடர்ந்து 26 மணி நேரம் இடைவிடாமல் சிலம்பாட்டம் நடத்த முடிவு செய்யப்பட்டுள்ளது.
இந்த சாதனை முயற்சி பாளை அண்ணா ஸ்டேடியத்தில் வரும் 23ம் தேதி மாலை 5 மணிக்கு ஆரம்பமாகிறது. தொடர்ந்து இடைவிடாமல் 24ம் தேதி இரவு 7 மணி வரை சிலம்பாட்டம் நடத்தப்படுகிறது. இந்த சாதனை நிகழ்ச்சியை முக்கிய அதிகாரிகள் துவக்கி வைக்கின்றனர். இந்த சாதனையை கின்னஸ் அமைப்பின் நிர்வாகி ராஜேந்திரன் கண்காணிக்கிறார். இந்த சாதனை நிகழ்ச்சியில் நெல்லை, கன்னியாகுமரி, தூத்துக்குடி உட்பட தென் மாவட்டங்களை சேர்ந்த பள்ளி, கல்லூரி மாணவ, மாணவிகள், சிலம்பாட்ட வீரர்கள், வீராங்கனைகள் சுமார் 500க்கும் மேற்பட்டோர் தொடர்ந்து இடைவிடாமல் சிலம்பாட்டத்தில் ஈடுபடுகின்றனர். வரும் 24ம் தேதி உலக சாதனையாளர் தினத்தையொட்டி இந்நிகழ்ச்சி நடத்தப்படுகிறது. இதில் பங்கேற்கும் சிலம்பாட்ட கலைஞர்களுக்கு சான்றிதழ்களும் வழங்கப்படுகிறது. ஏற்பாடுகளை பிலிப்பைன்ஸ் தாவூ மருத்துவ பல்கலைக் கழகம், புனே டிரான்ஸ்வேர்ல்டு கல்வி அகடாமி, புத்தனேரி வேலி அறக்கட்டளை, வெங்கடாம்பட்டி டிரஸ்ட் குழந்தைகள் இல்ல நிர்வாகிகள் செய்துள்ளனர் என்று தாவூ மருத்துவ பல்கலைக் கழக தென்னிந்திய மாணவர் சேர்க்கை இயக்குனர் குணசேகர், சமூக நல ஆர்வலர் திருமாறன் ஆகியோர் தெரிவித்தனர்.

http://www.dinamalar.com/district_detail.asp?id=666941