சிறுபான்மைப் புலம்பல்கள்..!
~~~~~~~~~~~~~~~~~~~~~~~~~

“இந்தியாவில் வசிக்கும் முஸ்லிம்கள்
சிறுபான்மையினர் அல்ல” எனும் மத்திய அமைச்சர்
நஜ்மா ஹெப்துல்லாஹ்வின் கருத்து நாடு முழுவதும்
அதிர்ச்சி அலைகளை ஏற்படுத்தியுள்ளது.

நஜ்மா அம்மையாரின் கருத்து
இந்துத்துவா திட்டத்தின் அடிப்படையிலானது.
அதை நாம் ஏற்றுக்கொள்ள முடியாது.

ஆனால்
நான் சொல்லப்போவது கொஞ்சம் வித்தியாசமான கோணத்திலானது.
குர்ஆனின் பார்வையிலானது.

முஸ்லிம்கள் ஒருபோதும் சிறுபான்மையினர் அல்ல.
“சிறுபான்மை அந்தஸ்து” பெறுவதற்காகப்
படைக்கப்பட்டவர்களும் அல்ல.

“நாங்கள் எண்ணிக்கையில் குறைவு,
ஆகவே ஐயாமாரே, அம்மாமாரே,
சலுகை காட்டுங்கள்” என்று சதா காலமும்
புலம்பிக்கொண்டிருப்பதற்காக உருவாக்கப்பட்டவர்களும் அல்லர்.

“நாங்கள் தலித்துகளைவிட மோசமானவர்கள் என்று
சச்சார் குழுவே சொல்லிவிட்டது.
எனவே கருணை காட்டுங்கள்” எனக்
கைநீட்டிக்கொண்டு அலைவதும்
முஸ்லிம் சமுதாயத்தின் நோக்கமல்ல.

முஸ்லிம்களைக் குர்ஆன் எப்படி வர்ணிக்கிறது?

“கலீஃபா (இறைவனின் பிரதிநிதி)

“உம்மத் (இலட்சியக் குழு)”

“கைரே உம்மத்( உலக மக்களுக்கு நேர்வழிகாட்டுவதற்காகத்
தேர்ந்தெடுக்கப்பட்ட மிகச் சிறந்த சமுதாயம்)”

“சொல்லாலும் செயலாலும் சத்தியத்திற்கு
சான்று வழங்குபவர்கள்”

“நன்மையை ஏவித் தீமையைத் தடுப்பவர்கள்”

“வாழ்வின் அனைத்துத் துறைகளிலும்
இறைநெறியை நிலைநாட்டுபவர்கள்”
என்றெல்லாம்தான் வர்ணிக்கிறது.

இறைவன் தங்கள் மீது சுமத்திய
இந்தக் கடமையை நிறைவேற்றிய காலம் வரை
முஸ்லிம்கள்தாம் இந்த உலகிற்கே வழிகாட்டினார்கள்.
தலைமைப் பொறுப்பும் அவர்களிடம்தான் இருந்தது.

என்றைக்கு இந்தக் கடமையிலிருந்து தவறினார்களோ
அன்றைக்கே அவர்களின் வீழ்ச்சியும் இழிவும் தொடங்கிவிட்டன.

அதன் ஒரு பகுதிதான் இந்தச் சிறுபான்மைப் புலம்பல்கள்..

ஆகவே முஸ்லிம்களே,

இந்தச் சிறுபான்மைக் கூக்குரலை விட்டொழித்து
இறைமறை உங்கள்மீது சுமத்தியுள்ள மேற்சொன்ன
கடமைகளை நிறைவேற்ற முன்வாருங்கள்.

பிறகு நிலைமை எப்படி மாறுகிறது என்பதைப் பாருங்கள்.
-சிராஜுல்ஹஸன்