பறக்கும் தட்டுக்களும் ஜின்களும்
==============================

by - Abu Malik

தொடர் 4: வேற்றுக்கிரக வேஷம்

Episode 44 – நரை நிறத்தவர்கள் (தொடர்ச்சி 03):

Episode 45 – நரை நிறத்தவர்கள் (தொடர்ச்சி 04)

(ஃபில் ஷ்னைடர் விரிவுரை தொடர்ச்சி....)

(ஃபில் ஷ்னைடர் விரிவுரை தொடர்ச்சி....)
.
டல்சி தளத்தில் நடந்த துப்பாக்கிச் சமர்:
~~~~~~~~~~~~~~~~~~~~~~~~~~~~~~~~~~~
“அன்று 1954 இல், ஜனாதிபதி ஐஸன்ஹவரின் நிர்வாகத்தின் கீழ், இந்த நாட்டின் அரசியல் சாசணத்தில் வரையறுக்கப் பட்டிருக்கும் சட்ட வரையறைகளுக்குப் புறம்பாக, வேற்றுக்கிரகவாசிகளுடன் ஓர் உடன்படிக்கையை ஏற்படுத்திக் கொள்ளுதல் குறித்த சில தீர்மாணங்களை மத்திய அரசு எடுத்தது. இந்த உடன்படிக்கையானது, “1954 கிரனாடா உடன்படிக்கை” (1954 Grenada Treaty) என்று தான் அன்று அழைக்கப்பட்டது. இந்த உடன்படிக்கையில், சம்பந்தப்பட்ட வேற்றுக்கிரகளுக்கு, அவர்கள் விரும்பும் போது அமெரிக்க பூமியிலிருந்து சில பசுமாடுகளை யாருக்கும் தெரியாமல் கடத்திச் செல்லலாம் என்று அமெரிக்க அரசு சார்பாக உத்தியோகபூர்வமாக அனுமதி வழங்கப் பட்டிருந்தது. மேலும், வேற்றுக்கிரகவாசிகளின் சில “பதியம்” (Implanting) சார்ந்த தொழிநுட்பங்களை மனித உடல்களில் பரிசோதனை செய்து பார்க்கும் பொருட்டு, தேவைப்படும் போது சில மனிதர்களைக் கடத்திச் செல்வதற்கும் அமெரிக்க அரசு சார்பாக இந்த உடன்படிக்கையில் வேற்றுக்கிரகவாசிகளுக்கு அனுமதியளிக்கப் பட்டிருந்தது.”

“ஆனால், சில நிபந்தனைகளின் அடிப்படையிலேயே இவ்வாறான அனுமதிகள் அவர்களுக்கு வழங்கப் பட்டிருந்தன. முக்கியமாக, கடத்திச் செல்லப்படும் மனிதர்கள், மற்றும் அவர்கள் மீது மேற்கொள்ளப்படும் பரிசோதனைகள் குறித்த தகவல்கள் அனைத்தையும் ஒளிவு மறைவில்லாமல் அமெரிக்க அரசுக்கு இவர்கள் அறிக்கையாக சமர்ப்பிக்க வேண்டும் என்பது ஒரு பிரதான நிபந்தனையாக இருந்தது.”

“நாள் செல்லச் செல்ல இந்த வேற்றுக்கிரகவாசிகள் இந்த நிபந்தனைகளை ஒவ்வொன்றாக தமது வசதிக்கேற்றவாறெல்லாம் மாற்றத் தொடங்கினார்கள். இறுதியாக ஒரு கட்டத்தில் இந்த ஒப்பந்தத்தையே அவர்கள் மதிக்காத அளவுக்கு தாம் விரும்பியவாறெல்லாம் கர்வத்தோடு நடந்து கொள்ள ஆரம்பித்தார்கள். 1979 ஆம் ஆண்டு காலப்பகுதியில் இது தான் வெளியுலகம் அறியாத நிதர்சணமாக இருந்தது. ஆனால், இவற்றுக்கும், டல்சி தளத்தில் மூண்ட துப்பாக்கிச் சண்டைக்கும் இடையில் எந்தச் சம்பந்தமும் இல்லை. சற்றும் எதிர்பாராத விதமாக நடந்த ஒரு விபத்து போன்ற அடிப்படையிலேயே அந்தச் சண்டை மூண்டது.”

“நானறிந்தவரை இன்று உலகில் இருக்கக் கூடிய ஆழ் நிலக்கீழ் இராணுவத் தளங்களிலேயே அதிக ஆழத்தில் நிர்மாணிக்கப் பட்டிருப்பது டல்சி இராணுவத் தளம் தான். இந்த இராணுவத் தளத்தின் ஒரு பகுதியை விஸ்தீரணம் செய்யும் செயல்திட்டம் ஒன்றில் ஒருமுறை நான் பணியமர்த்தப் பட்டிருந்தேன். நான் பணிபுரிந்த இந்தப் புதிய தொகுதியானது அடுக்கடுக்காக ஏழு மாடிகளைக் கொண்ட தொகுதியாகவே வடிவமைக்கப் படுவதாக இருந்தது. நிலத்துக்கு அடியில் சுமார் 2.5 மைல் (4 கிலோமீட்டர்) ஆழத்திலேயே இந்தத் தொகுதி வடிவமைக்கப் படுவதற்கான ஆயத்தங்கள் நடந்து கொண்டிருந்தன. இந்த ஆயத்தப் பணிகளின் போது, மேற்பரப்பின் பாலைவனப் பூமியிலிருந்து நிலத்தினுள் ஆழத்துக்குச் செல்லும் விதமாக, துளை இயந்திரங்கள் மூலம் நான்கு பிரதான துளைகளை (அகலமான சுரங்கங்களை) நாம் தோண்டிக் கொண்டிருந்தோம். இந்த நான்கு துளைகளையும் அடியால் இணைத்து, துல்லியமாகக் கணிக்கப்படும் வெடிகுண்டுகள் மூலம் ஏக காலத்தில் உள்ளுக்குள் பாரிய வெடிப்புகளை ஏற்படுதுவதன் மூலம், பாரியதொரு வெற்றிடத்தை உள்ளுக்குள் ஏற்படுத்துவதே இந்தப் பணியின் நோக்கமாக இருந்தது. பொதுவாக ஆழ் நிலக்கீழ் சுரங்கங்கள் இவ்வாறு திட்டமிட்ட அடிப்படைகளிலேயே தோண்டப் படுவதுண்டு.”

“இதில் எனது பணி, துளைகள் தோண்டப்பட்ட பின், அந்தத் துளைகள் ஒவ்வொன்றினுள்ளும் இறங்கிச் சென்று, அந்தந்த இடத்தின் மண், மற்றும் பாறை மாதிரிகளை உள்ளே ஆய்வு செய்து, அவற்றுக்கேற்ப எந்தெந்த இடங்களில் எவ்வளவு சக்தி வாய்ந்த வெடிகுண்டுகள் பொருத்தப்பட வேண்டும் என்பதைக் கணிப்பீடு செய்து, கூறுவது தான்.”

“தோண்டப்பட்ட ஒரு துளையினூடாக நான் எனது குழுவுடன் இறங்கிச் சென்று கொண்டிருந்தேன். திடீரென்று சற்றும் எதிர்பாராத விதமாக, நாம்மால் தோண்டப்படாத இன்னொரு பாரிய சுரங்கத்தை உள்ளே எதிர்கொள்ள நேர்ந்தது. பிரும்மாண்டமான ஒரு மண்டபம் போல் இந்தச் சுரங்கம் இருந்தது மட்டுமல்லாமல், அந்த மண்டபம் முழுவதும் வேற்றுக்கிரகவாசிகளால், குறிப்பாக உயரமான நரைநிற இனத்தவர்களால் (Large Greys) நிரம்பி வழிந்து கொண்டிருந்தது. இருதரப்பினரும் அங்கு ஒருவரையொருவர் சற்றும் எதிர்பார்க்கவில்லை. ஒருகணம் அதிர்ச்சியில் உறைந்து போனாலும், உடனே சுதாகரித்துக் கொண்ட நான் அவர்களை நோக்கி எனது துப்பாக்கியால் சுட ஆரம்பித்தேன். இரண்டு வேற்றுக்கிரகவாசிகளையே என்னால் சுட முடிந்தது. அப்போது என்னோடு எனது குழுவினர் 30 பேர் கூட இருந்தார்கள். இருதரப்பினரும் மாறி மாறிச் சுட்டுக் கொள்ள, சண்டை சூடுபிடிக்க ஆரம்பித்தது. சண்டை ஆரம்பித்த உடனேயே மேலிருந்த ஏனையோருக்குத் தகவல் எத்திவைக்கப்பட, உடனே மேலும் 40 பேர் நமக்கு உதவியாகக் கீழிறங்கி வந்தார்கள். ஆனால், வந்த அனைவருமே அங்கு கொல்லப்பட்டார்கள்.”

“உண்மையில் என்ன நடந்ததென்றால், ஏற்கனவே பல வருடங்களாக நிலத்துக்கு அடியில் அந்த இடத்தில் இயங்கிக் கொண்டிருக்கும் இந்த வேற்றுக்கிரகவாசிகளின் இரகசியத் தளத்தை, அது அங்கிருப்பது கூட தெரியாமல் நாமே எதிர்பாராதவிதமாக அம்பலப்படுத்தி விட்ட செயல் அவர்களையும் (வேற்றுக்கிரகவாசிகளையும்) கூட அதிர்ச்சியில் ஆழ்த்தி விட்டது. இவ்வாறான ஏராளமான வேற்றுக்கிரகவாசிகள் நமது பூமியில் பல லட்சம் வருடங்களாக வாழ்ந்து கொண்டிருக்கிறார்கள் என்பது பிறகு தான் எமக்குக் கூட தெரிய வந்தது. “பண்டைய விண்வெளி வீரர் கோட்பாடு” (Ancient Astronauts Theory) பற்றி இன்று பிரஸ்தாபித்துக் கொண்டிருக்கக் கூடிய ஒரு சாராரின் வாதங்களுக்கு அடிப்படையாக இந்த வேற்றுக்கிரகவாசிகள் கூட ஒருவேளை இருக்கலாம் என்றே நினைக்கத் தோன்றுகிறது.”

“எது எப்படியோ, இந்தச் சண்டையின் போது வேற்றுக்கிரகவாசிகள், எனது நெஞ்சைக் குறிவைத்துத் தமது ஆயுதத்தால் மேற்கொண்ட துப்பாக்கிச் சூட்டின் விளைவாக எனது நடு நெஞ்சில் பலத்த காயம் ஏற்பட்டது. அவர்களது ஆயுதமும் துப்பாக்கி போன்று தான் தொழிற்பட்டது. ஆனால், நாம் கையில் ஏந்திச் சுடும் துப்பாக்கி போல் அவர்களது ஆயுதம் இருக்கவில்லை. மாறாக அவர்களது உடலோடு ஒட்டியிருக்கும் சிறிய பெட்டி போன்ற வடிவத்திலான ஓர் ஆயுதமாகவே அது இருந்தது. அதிலிருந்து புறப்பட்ட சக்தி போன்ற ஏதோ ஒன்று நேராக வந்து, எனது நெஞ்சைத் துளைத்தது. இந்தத் தாக்குதலின் விளைவாக எனது உடலுக்குள் மிதமிஞ்சிய அளவில் (High dosage) கோபால்ட் கதிர்வீச்சுக்கள் (Cobalt radiation) பரவியிருந்தன. இந்தக் கதிர்வீச்சின் விளைவாகவே எனக்குப் புற்றுநோய் (Cancer) ஏற்பட்டது.”
(ஃபில் ஷ்னைடர், தனது உடையை நீக்கி, தனது நெஞ்சில் இருக்கும் அந்தப் பெரிய காயத்தின் மூலம் ஏற்பட்ட தழும்பை மக்களுக்குக் காட்டுகிறார்.)

“லாஸ் வேகஸுக்கு வடக்கில் இருக்கும் ‘ஏரியா 51’ (Area 51) இல் நான் பணிபுரிய ஆரம்பிக்கும் வரை, வேற்றுக்கிரகவாசிகள், மற்றும் அவர்களது தொழினுட்பங்கள் போன்றவற்றிலெல்லாம் ஆரம்ப காலங்களில் எனக்கு அவ்வளவு ஈடுபாடு இருக்கவில்லை. 1979 ஆம் ஆண்டு நடந்த (டல்சி துப்பாக்கிச் சூட்டு) சம்பவத்தினால் ஏற்பட்ட காயங்கள் குணமாகவும், உடல் ஆரோக்கியம் பெறவும் செலவான இரண்டு ஆண்டுகளுக்குப் பிறகு, மீண்டும் நான் வேலைக்குச் செல்லலானேன். Morrison and Knudson, EG&G போன்ற தனியார் நிறுவனங்களிலும் பணிபுரியலானேன்.”

“ஏரியா 51 இல், பல்வேறு வகைகளைச் சார்ந்த பல விண்கலங்களை அவர்கள் பரிசோதி்த்துக் கொண்டிருக்கிறார்கள். இங்கிருக்கும் உங்களில் எத்தனை பேருக்கு “பாப் லஸார்” (Bob Lazar) இன் கதை தெரியும்? அவர் ஓர் இயற்பியலாளர். ஏரியா 51 இல் பணியில் ஈடுபத்தப் பட்டிருக்கும் ஒருவரே அவர். வேற்றுக்கிரகவாசிகளிடமிருந்து மீட்கப்பட்ட பல வகையான பறக்கும்தட்டுக்களதும் “உந்து சக்தி” சார்ந்த தொழினுட்ப இரகசியங்களைக் கண்டுபிடித்தல், அதே தொழினுட்பங்களை மீள வடிவமைத்தல் போன்ற பல ஆய்வுகளிலேயே இவர் தனது முழு நேரத்தையும் அங்கு செலவிட்டுக் கொண்டிருக்கிறார்.”

இரகசிய அரசாங்கம், இரகசிய ரயில் பெட்டிகள், கைவிலங்கு ஒப்பந்தம்:
~~~~~~~~~~~~~~~~~~~~~~~~~~~~~~~~~~~~~~~~~~
“இன்று நமது நாட்டின் மத்திய அரசு குறித்தே நான் மிகவும் அஞ்சுகிறேன். ஏனெனில், அவர்கள் இந்த நாட்டு மக்களுக்குப் பொய்களையே சொல்லியிருக்கிறார்கள்; செனட் சபையைச் செயலிழக்கச் செய்திருக்கிறார்கள்; மேலும், வேற்றுக்கிரகவாசிகள் குறித்த எந்த உண்மைகளையும் மக்களுக்குச் சொல்ல மறுக்கிறார்கள். இவ்வாறு எனக்குப் பட்டியல் போட்டு அவர்களது தவறுகளைச் சொல்லிக் கொண்டே போகலாம். இந்த நாட்டின் நிர்வாகம் குறித்து அதிருப்தியின் உச்சகட்டத்திலேயே நான் இருக்கிறேன்.”

“அண்மையில் எனக்குத் தெரிந்த ஒருவர்... நான் வாழும் போர்ட்லண்ட், ஒரிகோன் பிரதேசத்திலேயே வாழ்ந்து வந்த ஒருவர். இவர் ‘Gunderson Steel Fabrication’ எனும் இரும்புக் கைத்தொழில் கம்பெனியிலேயே பணிபுரிந்து வந்தார். இந்த நிறுவனத்தின் பிரதான பணி, ரயில் பெட்டிகளை வடிவமைப்பது தான். இந்த நபரை எனக்கு சுமார் 30 வருடங்களாகத் தெரியும். மிகவும் அமைதியான ஒரு மனிதர் இவர்.”

“ஒரு நாள் இந்த நபர் என்னைச் சந்திக்க வந்தார். முகத்தில் அதிர்ச்சி, ஆச்சரியம் நிறைந்தவராகவே அன்று அவர் காணப்பட்டார். வந்தவர் என்னிடம் “அவர்கள் ரயில் பெட்டிககளால் ஆன சிறைச்சாலைகளை வடிவமைத்துக் கொண்டிருக்கிறார்கள்” என்று பதட்டம் மிகுந்த குரலில் சொன்னார். அவரிடம் லேசான ஒரு நடுக்கமும் காணப்பட்டது. விவரமாக அவர் சொல்லும் போது, தான் பணி புரியும் “கண்டர்ஸன்” நிறுவனம், அமெரிக்க மத்திய அரசோடு ஒரு வியாபார ஒப்பந்தம் செய்து கொண்டதாகக் கூறினார். ரயில் பெட்டிச் சிறைக்கூண்டுகளை வடிவமைக்கும் ஒரு பாரிய செயல்திட்டமே இந்த வியாபார ஒப்பந்தம். 107,200 ரயில் பெட்டிச் சிறைக்கூண்டுகளையும், ஒவ்வொரு ரயில் பெட்டிச் சிறைக்கூண்டுக்கும் 143 ஜோடி இரும்பினாலான விலங்குகளையும் தயாரிக்குமாறு அரசாங்கம் தமது நிறுவனத்துக்கு ஆடர் செய்துள்ளதாக அவர் குறிப்பிட்டார்.”

“மேலும் இதே போன்ற ஆடர்கள், மேலும் 11 நிறுவனங்களுக்கும் பகிர்ந்தளிக்கப் பட்டுள்ளன என்றும் அவர் குறிப்பிட்டார். அறியக் கிடைத்த தகவல்களின் பிரகாரம் இந்த வியாபாரச் செயல்திட்டத்துக்கான கூலியாக “கண்டர்ஸன்” நிறுவனத்துக்கு அமெரிக்க அரசு 2 பில்லியன் (இருநூறு கோடி) அமெரிக்க டாலர்களைச் செலுத்துகிறது. மேலும், ‘Bethlehem Steel’ போன்ற நிறுவனங்கள் கூட இந்தச் செயல்திட்டத்தில் அங்கம் வகிக்கின்றன என்றும் குறிப்பிட்டார்.”

“போர்ட்லண்ட் நகரின் வடக்குப் புறம் இருக்கும் ரயில் யார்டில் இருந்த ஒரு ரயில் பெட்டிச் சிறைக்கூண்டை எனக்குக் காண்பித்து, அவற்றுள் ஒன்று தான் இது என்றும் அவர் குறிப்பிட்டார். நான் தேடிப் பார்த்தேன். அவர் கூறிய செய்திகள் முற்றிலும் சரியானவை. ஒரேயோர் உதாரணத்தைக் குறிப்பிடுகிறேன். 107,200 என்பதை, 143 ஆல் பெருக்கி, அதை மீண்டும் 11 ஆல் பெருக்கிப் பாருங்கள். வரும் விடை 15,000,000 ஆகத் தான் இருக்கும். அனேகமாக, இந்த நாட்டில் இவ்வளவு எண்ணிக்கையான மக்கள் புதிய உலக ஒழுங்குக்கு எதிராகக் குரல் கொடுத்து எழுந்து நிற்கலாம் என்று அவர்களது கணிப்புகள் கருதுவதால் தான், குரல் கொடுக்கும் மக்களை ஏக காலத்தில் அடைத்து வைப்பதற்கு ஏதுவாக இந்தச் சிறைக்கூண்டுகள் முன்கூட்டியே வடிவமைக்கப் படுவதாக இருக்க வாய்ப்புகள் மிக அதிகம்.”

“இவர்களுக்கு எதிராகத் தேர்தல்களில் வாக்களிப்பதன் மூலம் இந்தச் சதிகாரர்களை அதிகார நாற்காளிகளிலிருந்து துரத்தியடித்து விடலாம் என்று நீங்கள் கனவு கண்டு கொண்டிருந்தால், அந்த எண்ணத்தை மாற்றிக் கொள்ளுங்கள். அது நடக்கப் போவதில்லை. தேர்தல்களில் யார் வெற்றி பெற்றாலும், யார் தோற்றாலும், அதிகாரத்தில் இருக்கப் போவதென்னவோ இவர்கள் மட்டும் தான். எமது நாட்டின் தற்கால ஆட்சிக் கட்டமைப்பு என்பது, ஜனநாயகம் அல்ல; “தொழினுட்பநாயகம்” (technocracy) தான். இது ஒரு புதுவகையான கொத்தடிமை ஆட்சிமுறை மட்டுமே. இந்த ஆட்சிமுறைக்கும், அமெரிக்காவின் குடியரசுக்கும் இடையில் எந்த சம்பந்தமும் இல்லை. இவர்கள் அனைவருமே கடவுளை மறுக்கக் கூடிய கோட்பாடுகளைக் கொண்டவர்கள். அனேகமான பாடசாலைகளில் இன்று மத அனுஷ்டானங்கள், பிரார்த்தனைகள் செய்வதைக் கூட சட்டவிரோதம் என்று இவர்கள் புது சட்டம் இயற்றி விட்டார்கள். இன்று நமது நாட்டில் பல பாடசாலைகளில் மத அனுஷ்டானங்களோ, பிரார்த்தனைகளோ பகிரங்கமாக நடத்தப் பட்டால், அதற்கான தண்டனையாக நீங்கள் ஒரு லட்சம் அமெரிக்க டாலர் தண்டப்பண அறவீட்டையும், இரண்டு வருடங்கள் சிறைத் தண்டனையையும் பெற்றுக் கொள்ளலாம். இது தான் இன்றைய நிலை.”

“நாம் நினைத்தால், இந்த நிலையை நம்மால் மாற்றலாம் என்றே நான் நம்புகிறேன். மேலும், இந்த நாட்டின் மக்களை அடிமைகளாக மாற்றுவதற்கே இந்த அரசு முயற்சித்துக் கொண்டிருக்கிறது என்றும் நான் உறுதியாக நம்புகிறேன். நான் ஒரு சிறந்த பேச்சாளர் கிடையாது. எனக்கு அழகாகப் பேசவும் தெரியாது. ஆனால், ஒரு நாள் யாராவது எனது நெஞ்சில் ஒரு துப்பாக்கிக் குண்டைச் செலுத்தி, நான் கீழே வீழ்ந்து மரணிக்கும் வரை எனது வாய் இந்த உண்மைகளை உரத்துக் கூறிக் கொண்டேயிருக்கும். அவர்களாக என்னைக் கொல்லும் வரை நான் ஓயப் போவதில்லை. ஏனெனில், இவர்களது அராஜகங்களை இவ்வாறான சபைகளில் பகிரங்கமாக எடுத்துச் சொல்வதானது, எனது உயிரை விடப் பெறுமதி வாய்ந்தது என்றே நான் கருதுகிறேன்.”

அமெரிக்காவின் கறுப்புச் செயல்திட்ட உடன்படிக்கையாளர்கள்:
~~~~~~~~~~~~~~~~~~~~~~~~~~~~~~~~~~
“மேலும் பல பிரச்சினைகள் எம்மைச் சூழவுள்ளன. 1993 ஆண்டுக்குரிய பல சுவாரசியமான விபரக் கோவைகள் என் கைவசம் உள்ளன. இன்றைய திகதிக்கு 29 வகையான சோதனைத் தரத்தைச் சார்ந்த, “களவு” ரக விமானங்கள் (Prototype Stealth Aircrafts) இந்த நாட்டுக்காக வடிவமைக்கப்பட்டிருக்கின்றன என்று தான் உத்தியோகபூர்வமான பதிவுகள் கூறுகின்றன. அமெரிக்க காங்கிரஸ் மூலம் ஐந்தாண்டுத் திட்டம் எனும் திட்டத்தின் கீழ், உத்தியோகபூர்வமாக இவற்றுக்காக ஒதுக்கப் பட்டிருக்கும் நிதி, 245.6 மில்லியன் (24.5 கோடி) அமெரிக்க டாலர்களாகும். உண்மை என்ன தெரியுமா? இந்தச் சிறிய நிதித் தொகையை வைத்துக் கொண்டு இந்த அதி நவீன விமானங்களுக்குத் தேவையான உதிரிப் பாகங்களைக் கூட வாங்க முடியாது. திரைமறைவில் இவற்றுக்காக ஒதுக்கப்பட்ட நிதி இதுவல்ல. கிட்டத்தட்ட 1.3 ட்ரில்லியன் (1 லட்சத்து 30 ஆயிரம் கோடி) அமெரிக்க டாலர்களே இவற்றுக்கான திரைமறைவு ஒதுக்கீடு. அதுவும் ஐந்தாண்டு ஒதுக்கீடு அல்ல இது; இரண்டாண்டு ஒதுக்கீடு. நமது பணத்தை இப்படி இறைக்கும் அரசாங்கம் நமக்குப் பொய்க் கணக்குக் காட்டுகிறது.”

“இந்த இரகசியச் செயல்திட்டங்களுக்கான ஒப்பந்தக்காரர்கள்: EG&G, Westinghouse, McDonnell Douglas, Morrison-Knudson, Wackenhut Security Systems, Boeing Aerospace, Lorimar Aerospace, Aerospacial in France, Mitsubishi Industries, Ryder Trucks, Bechtel, I.G. Farben, மற்றும் நூற்றுக்கணக்கான சிறிய நிறுவனங்களும் ஆகும். சுதந்திரமான ஒரு நாட்டை நேசிக்கும் நாம் இப்படிப்பட்ட ஓர் அடிமை வாழ்க்கையைத் தான் இனியும் விரும்பி ஏற்றுக் கொள்ள வேண்டுமா? என்னால் இனி அது முடியாது.”

இது தான் ஃபில் ஷ்னைடர் ஆற்றிய விரிவுரையின் சுருக்கமன வடிவம். இந்த விரிவுரையின் போதும், மற்றும் இது போன்ற மேலும் சில விரிவுரைகளின் போதும் அன்று அவர் குறிப்பிட்ட பல தகவல்களை ஊர்ஜிதப் படுத்திக் கொள்ளும் வசதி அனேகமானோருக்கு அன்று இருக்கவில்லை.

ஆனால், பிற்காலத்தில் ஃபில் கூறிய தகவல்களுள் பல தகவல்கள் உண்மையானவை என்பது ஒவ்வொன்றாக உலகின் நாலா பக்கங்களிலும் பல்வேறு ஆய்வுகள் மூலம் நிரூபணமாகத் தொடங்கின. இந்த அடிப்படையில் மேற்கொள்ளப் பட்ட ஓர் ஆய்வு பற்றிய விபரத்தை மட்டும் கீழே குறிப்பிடுகிறேன். இது மட்டும் என்றில்லாமல் இன்னும் பல சுயாதீனமான ஆய்வுகள் மூலமும் ஃபில் ஷ்னைடர் அன்று சொன்ன பல தகவல்கள் நிதர்சணத்தில் நடந்து கொண்டிருக்கும் உண்மைகள் என்பது ஊர்ஜிதமாயின.

உதாரணம்:
பிற்காலத்தில், ஃப்ரான்ஸ் நாட்டைச் சேர்ந்த ஓர் ஆய்வுக்குழு, தொன்னூறு பக்கங்களைக் கொண்ட ஓர் ஆய்வறிக்கையை வெளியிட்டது. ஃபில் ஷ்னைடர் போன்றோர் மூலம் குறிப்பிடப்பட்ட பல செய்திகள் உண்மையானவை என்பதையும், அமெரிக்க அரசுக்கும், வேற்றுக்கிரகவாசிகளுக்கும் இடையில் கள்ளத் தொடர்புகள் நிலவுகின்றன என்பதையும் நிரூபிக்கும் விதமாகவுமே இந்த ஆய்வறிக்கையின் முடிவுகள் அமைந்திருந்தன. அறிக்கை பற்றிய சாராம்சம் இது தான்:

COMETA அறிக்கை:
~~~~~~~~~~~~~~~~~
1999ம் ஆண்டு, ஃப்ரான்ஸில் ஒரு முக்கியமான அறிக்கை வெளியிடப்பட்டது. இந்த அறிக்கையானது, “UFOs and Defense: What must we be prepared for?” ("Les Ovni Et La Defense: A quoi doit-on se préparer?") எனும் தலைப்பிலேயே வெளியிடப் பட்டது. தொன்னூறு பக்கங்களைக் கொண்ட இந்த ஆய்வறிக்கையானது, COMETA அறிக்கை என்றே அழைக்கப் படது.

இந்த அறிக்கைக்கு COMETA அறிக்கை என்று சொல்லப்படுவதற்கான காரணம், இந்த ஆய்வு COMETA சார்பாக மேற்கொள்ளப் பட்டதால் தான். COMETA என்பதன் அர்த்தம், Comité d'Études Approfondies, ("Committee for in-depth studies") என்பது தான். அதாவது, “ஆழமான ஆய்வுகள் கமிட்டி” என்பது தான் இதன் அர்த்தம்.

COMETA என்பது, ஃப்ரான்ஸ் நாட்டைச் சேர்ந்த, அரச சார்பற்ற ஓர் ஆய்வுக்குழு. இந்தக் குழுவின் அங்கத்தவர்களுள் அனேகமானோர் ஃப்ரான்ஸ் நாட்டுப் பாதுகாப்பு அமைச்சின் அதி உயர் அதிகாரிகளாவர்.

பறக்கும் தட்டுக்கள் குறித்து விரிவாக மேற்கொள்ளப்பட்ட, பக்கச்சார்பற்ற, ஆழமான ஓர் ஆய்வின் முடிவாகவே இந்த ஆய்வறிக்கை அமைந்திருந்தது.

இந்த அறிக்கையானது பல அம்சங்களை உள்ளடக்கியதாக அமைந்திருந்தது. பிரத்தியேகமாக தேசிய பாதுகாப்பு குறித்த பல விடயங்களைக் கூட கேள்வியெழுப்பும் விதமாகவே இந்த அறிக்கை அமைந்திருந்தது. பல வருடங்களாக, ஒரு குழுவாக மேற்கொள்ளப் பட்ட ஒரு நீண்ட ஆய்வின் முடிவாகவே இந்த அறிக்கை தயாரிக்கப் பட்டிருந்தது. இந்த ஆய்வுக் குழுவில், “தேசிய பாதுகாப்பிற்கான உயர்கல்வி நிறுவணம்” (Institute of Advanced Studies for National Defense, or IHEDN) இன் முன்னாள் ஆடிட்டர்கள், மற்றும் பல்வேறு துறைசார் நிபுணர்கள் ஆகியோர் உள்ளடக்கப் பட்டிருந்தார்கள்.

இந்த அறிக்கை, பொதுமக்கள் பார்வைக்கு சமர்ப்பிக்கப் படுவதற்கு முன்பாக, அப்போதைய ஃப்ரான்ஸ் ஜனாதிபதி “ஜாக்குவிஸ் சிராக்” (Jacques Chirac), மற்றும் பிரதமர் “லயனல் ஜொஸ்பின்” (Lionel Jospin) ஆகியோருக்கே இது முதலில் சமர்ப்பிக்கப் பட்டது. மேலும், விமானப்படைத் தளபதியும், முன்னாள் IHEDN இயக்குனருமான, “ஜெனரல் பர்னார்ட் நோர்லைன்” (General Bernard Norlain) இந்த அறிக்கைக்கு அணிந்துரை வழங்கியிருந்தார்.

மேலும் இந்த அறிக்கையானது, André Lebeau இன் அறிமுகவுரையோடு தான் ஆரம்பிக்கப் பட்டிருந்தது. இவர், ஃப்ரான்ஸ் நாட்டின் “NASA” என்று அழைக்கப்படும், “விண்வெளி ஆய்வுக்ளுக்கான தேசிய மையம்” (National Center for Space Studies (Centre National D’études Spatiales) - CNES) இன் முன்னாள் தலைவர் என்பது குறிப்பிடத்தக்கது.

இந்த ஆய்வை மேற்கொண்ட குழுவில் அங்கம் வகித்த அனைவருமே சம்பந்தப்பட்ட துறைகளில் நிபுணத்துவம் பெற்றவர்களாகவே இருந்தார்கள். இந்த ஆய்வுக் குழுவுக்குத் தலைமை தாங்கும் விதமாக விமானப் படைத் தளபதி “ஜெனரல் டெனிஸ் லெட்டி” (General Denis Letty) என்பவரே இருந்தார். மேலும், ஃப்ரான்ஸ் ஜனாதிபதி, பிரதமர், மற்றும் விண்வெளி ஆய்வு மையத்தின் முன்னாள் தலைவர் போன்ற பிரமுகர்கள் வாயிலாக இந்த அறிக்கை அங்கீகாரம் பெற்றிருந்ததால், அரச அங்கீகாரம் பெற்ற ஓர் ஆய்வறிக்கையாகவே இது கருதப்பட்டது.

இந்த ஆய்வறிக்கையின் மையக் கருத்தாக பறக்கும் தட்டுக்களே இருந்தன. வேற்றுக்கிரகவாசிகள் குறித்த பல்வேறு ஆதாரபூர்வமான தகவல்கள் இதில் ஆழமான ஆய்வுகளுக்கு உட்படுத்தப்பட்டு, ஆய்வின் இறுதியில், பறக்கும் தட்டுக்கள், மற்றும் வேற்றுக்கிரகவாசிகள் எதுவும் கற்பனையோ, கட்டுக்கதையோ அல்ல; தினசரி இன்று உலகம் முழுவதும் நிகழ்ந்து கொண்டிருக்கும் நிதர்சண உண்மைகள் எனும் முடிவு எடுக்கப் பட்டிருந்தது. வேற்றுக்கிரகவாசிகள் குறித்து இன்றைய உலகில் பல ஆய்வாளர்கள் முன்வைத்திருக்கும் கருத்துக்கள், மற்றும் தகவல்களில் அனேகமானவை உண்மையானவை என்றும் இந்த அறிக்கை சந்தேகத்துக்கிடமின்றி உறுதிப் படுத்தியது.

மேலும், ஃப்ரான்ஸ் அரசாங்கம் இது குறித்த தனது நிலைபாடுகளில் அவசர மாற்றங்களைக் கொண்டுவர வேண்டுமென்றும், இது குறித்து இன்னும் பல உத்தியோகபூர்வமான ஆய்வுகள் அரச சார்பில் மேற்கொள்ளப்பட வேண்டுமென்றும் இந்த ஆய்வறிக்கை, ஃப்ரான்ஸ் அரசுக்குப் பரிந்துரை செய்திருந்தது.

இந்த அறிக்கையில் வேற்றுக்கிரகவாசிகள் குறித்து முன்வைக்கப்பட்ட பல கருத்துக்கள் ஃபில் ஷ்னைடர் போன்றோர் ஏற்கனவே முன்வைத்த பல கருத்துக்களை சந்தேகத்துக்கிடமின்றி நிரூபிக்கும் விதமாக அமைந்திருந்ததே ஆச்சரியமான உண்மை.

இந்த அறிக்கையை வாசிக்க விரும்புவோரும், மேலும் ஃபில் ஷ்னைடர் குறித்து மேலதிக ஆய்வுகளில் ஈடுபட விரும்புவோரும் பின்வரும் இணைப்புகள் வாயிலாக மேலதிகத் தேடல்களைத் தொடரலாம்:

http://www.ufoevidence.org/newsite/files/COMETA_part1.pdf
http://www.ufoevidence.org/topics/cometa.htm
http://www.apfn.org/apfn/phil.htm
https://en.wikipedia.org/wiki/UFO_conspiracy_theory
http://badufos.blogspot.com/2014_12_01_archive.html

இதுவரை நாம் நரை நிறத்தோர் (Grey Aliens) எனும் வேற்றுக்கிரகவாசி இனத்தவர்களைப் பற்றி ஓரிரு ஆதாரங்கள் சகிதம் பார்த்தோம். இவர்கள் குறித்த தகவல்களும் சான்றுகளும் ஆயிரக்கணக்கில் இணையத்தில் காணக் கிடைக்கின்றன. உத்தியோகபூர்வமான, நம்பத்தகுந்த சான்றுகளாக இருப்பவற்றுள் ஒன்றிரண்டை மாத்திரமே இங்கு நான் உதாரணம் காட்டியிருக்கிறேன். 

இவர்கள் குறித்து இவ்வளவும் போதுமென்று கருதுகிறேன். இனி இன்னோர் இனத்தவர் பற்றி அடித்த எபிசோடில் நோக்கலாம்.

இன் ஷா அல்லாஹ் வளரும்...

- அபூ மலிக்

Episode 46: “ஹொப்கின்ஸ்வில்” பூதம் (Hopkinsville goblin):